అన్నా హజారేకి న్యాయ శాస్త్ర విద్యార్థి లీగల్‌ నోటీసు

న్యూఢిల్లీ: ఇరవై రెండేళ్ల న్యాయశాఖ విద్యార్థి ఒకరు అన్నా హజారేకి 'దేశప్రజల్ని తప్పుదారి పట్టిస్తున్నారని' లీగల్‌ నోటీసు ఇచ్చాడు. అన్నా బృందం అవినీతి మీద పోరాటాన్ని ఒక్క పార్టీకి వ్యతిరేకంగా మళ్లించి భారతీయుల మనోభావాలను దెబ్బతీసిందని విభోర్‌ ఆనంద్‌ అనే యువకుడు ఆ నోటీసులో పేర్కొన్నాడు. అన్నా బృందంలోని సభ్యులందరికీ కూడా ఈ నోటీసులను ఇచ్చారు. పూర్తిగా రాజకీయాలకు అతీతంగా అన్నా ఉద్యమించినందుకు దేశంలో లక్షలాది ప్రజలు స్ఫూర్తి పొందారని, అలాంటిది ఇప్పుడు అన్నా బృందం తమ పంథా మార్చుకుని ఒక్క కాంగ్రెస్‌ పార్టీనే లక్ష్యంగా చేసుకుందని ఈ నోటీసులో పేర్కొన్నారు. లోక్‌పాల్‌ బిల్లు కోసం శీతాకాల సమావేశాలవరకూ కూడా ఆగకుండా అన్నాబృందం ప్రతినిధులు వచ్చే ఏడాది జరిగే ఐదు రాష్ట్రాల ఎన్నికలలో కాంగ్రెస్‌కి వ్యతిరేకంగా ప్రచారం గురించి కూడా ప్రకటనలు చేశారని, హిసార్‌ ఉప ఎన్నికకీ అదే ధోరణిలో ప్రచారం ప్రారంభించారని నోటీసులో పేర్కొన్నారు. ఈ చర్యలు అవినీతి వ్యతిరేక ఉద్యమాన్ని నీరుకారుస్తున్నాయని అందులో పేర్కొన్నారు.

ప్రశాంత్‌భూషణ్‌పై దాడి

న్యూఢిల్లీ: ప్రముఖ న్యాయవాది, అన్నా బృందంలో కీలక సభ్యుడు, లోక్‌పాల్‌ ముసాయిదా కమిటీ సభ్యుడైన ప్రశాంత్‌భూషణ్‌పై ముగ్గురు యువకులు దాడి చేశారు. సుప్రీంకోర్టులో ఆయన తన ఛాంబర్‌లో ఉండగా వీరు దూసుకువచ్చి విచక్షణారహితంగా కొట్టారు. అనంతరం వీరు పారిపోతుండగా జూనియర్‌ న్యాయవాదులు ఒకరిని పట్టుకుని చితకబాదారు. అనంతరం పోలీసులకు అప్పగించారు. వారు ఆ యువకుడిని అరెస్టు చేశారు. పారిపోయిన మరో ఇద్దరి కోసం పోలీసులు గాలిస్తున్నారు. కాశ్మీర్‌లో రెఫరెండం చేయాలన్న ఆయన వ్యాఖ్యలకు నిరసనగా ఈ దాడి జరిగినట్టు తెలుస్తోంది. శివసేనకు చెందిన కార్యకర్తలే ఈ దాడులకు పాల్పడినట్టు తెలుస్తోంది. ప్రశాంత్‌ భూషణ్‌పై దాడిని కిరణ్‌బేడీ ఖండించారు.
ప్రశాంత్‌భూషణ్‌కు చికిత్స
 భగత్‌సింగ్‌ క్రాంతి సేన కార్యకర్తల దాడిలో గాయపడిన సామాజికవేత్త అన్నా హజారే బృందం సభ్యుడు, సుప్రీంకోర్టు న్యాయవాది ప్రశాంత్‌భూషణ్‌ను రాం మనోహర్‌ లోహియా ఆస్పత్రికి తరలించి చికిత్స చేశారు. భూషణ్‌పై దాడిని అన్నా టీం ఖండించింది.
దాడిని ఖండించిన హోం మంత్రి
అన్నా టీం మెంబర్‌ ప్రశాంత్‌భూషణ్‌పై జరిగిన దాడిని కేంద్రహోం మంత్రి చిదంబరం, అన్నా బృందం మెంబర్‌ కిరణ్‌బేడీ, లోక్‌సత్తా అధ్యక్షుడు జయప్రకాశ్‌నారాయణలు ఖండించారు.
దాడి చేసింది...
ప్రశాంత్‌భూషణ్‌పై దాడి చేసింది భగత్‌సింగ్‌ క్రాంతి సేన కార్యకర్తలేనని పోలీసులు అనుమానిస్తున్నారు. ఈ మేరకు సుప్రీంకోర్టు ఆవరణలో కరపత్రాలు లభించాయి.

దుర్గామాతను దర్శించుకున్న సినీహీరో అల్లు అర్జున్‌

విజయవాడ: తెలుగు సినీహీరో అల్లు అర్జున్‌ ఈరోజు ఇంద్రకీలాద్రిపై కనకదుర్గ అమ్మవారిని దర్శించుకున్నారు. ఈరోజు మూలా నక్షత్రం కావటంతో ఆలయంలో భక్తులు పోటెత్తారు. దీంతో ఆలయ ఈఓ, ఎమ్మెల్యే వెల్లంపల్లి శ్రీనివాస్‌లు అల్లు అర్జున్‌ను ఆయన వెంట వచ్చినవారిని కిందనుంచి స్వయంగా తీసుకుని వచ్చారు. ఈఓ వాహనంలో వారిని పైకి తీసుకుని వచ్చారు. అంతరాలయ దర్శనం చేయించి పండితులతో అమ్మవారి శేషవస్త్రం కప్పి ప్రసాదం అందజేయించారు.

రాష్ట్రంలో అప్రకటిత రాష్ట్రపతి పాలన: కొణతాల

హైదరాబాద్: ప్రస్తుతం రాష్ట్రంలో అప్రకటిత రాష్ట్రపతి పాలన కొనసాగుతోందని వైఎస్‌ఆర్ కాంగ్రెస్ పార్టీ నేత కొణతాల రామకృష్ణ అన్నారు. వైఎస్‌ఆర్ కాంగ్రెస్ పార్టీ కార్యాలయంలో కొణతాల రామకృష్ణ మీడియా సమావేశాన్ని నిర్వహించారు. మీడియా సమావేశంలో మాట్లాడుతూ.. తెలంగాణ ప్రాంతమంతా పోలీసు రాజ్యంగా మారిందన్నారు. రాష్ట్ర ప్రజలు గాడాంధకారంలో మునిగిపోయారని ఆయనఅన్నారు.

మంత్రి పదవికి కోమటిరెడ్డి రాజీనామా

హైదరాబాద్‌ : మంత్రి కోమటిరెడ్డి తన పదవికి రాజీనామా చేశారు. ఈ సాయంత్రం ఆయన గవర్నర్‌ను కలిసి రాజీనామా లేఖను సమర్పించారు. గత కొంత కాలంగా తెలంగాణ ఉద్యమంపై ముఖ్యమంత్రి అనుసరిస్తున్న వైఖరిపై కోమటిరెడ్డి అసంతృప్తితో ఉన్న విషయం తెలిసిందే.

కర్నాటక మంత్రిని చెప్పుతో కొట్టిన నేత

బెంగుళూరు : కర్నాటక విధానసౌధలో ఓ మంత్రికి ఘోర పరాభవం ఎదురైంది. గృహ నిర్మాణ శాఖ మంత్రి సోమన్నను మాజీ బీజపీ నేత ప్రసాద్‌ చెప్పుతో కొట్టారు. కార్పొరేషన్‌ ఎన్నికల్లో తనకు టికెట్‌ రాకుండా అడ్డుకున్నారంటూ మంత్రిపై దాడికి దిగారు. వెంటనే రగంలోకి దిగిన విధానసౌధ పోలీసులు ప్రసాద్‌ను అరెస్ట్‌ చేశారు

తెలంగాణపై... అన్నీ రాజకీయపక్షాలు అభిప్రాయాలు ప్రకటించాలి

పురందేశ్వరి
హైదరాబాద్‌ : రాష్ట్రంలోని అన్నీ రాజకీయపక్షాలు తెలంగాణపై తమ వైఖరిని ప్రకటించిన అనంతరమే దీనిపై కేంద్రం ఒక నిర్ణయం తీసుకుంటుందని కేంద్ర మంత్రి పురందేశ్వరి అన్నారు. సమస్య పరిష్కారానికి కేంద్రం కృషి చేస్తోందని ఆమె తెలిపారు. రెండు ప్రాంతాల కాంగ్రెస్‌ నేతల అభిప్రాయాలను రాష్ట్ర వ్యవహారాల ఇన్‌ఛార్జి గులాంనబీ ఆజాద్‌ నివేదిక రూపంలో సోనియాకు ఇచ్చినందున తదుపరి చర్యలు వేగవంతం చేస్తారన్నారు. రాయలసీమలోని కర్నూలు, అనంతపురం జిల్లాలతో కలిసి తెలంగాణ ఏర్పాటుకు కేంద్రం ప్రతిపాదించిందన్న సంగతి తనకు తెలియదన్నారు