1.జిల్లాలో రూ.150 కోట్లతో పలు రోడ్లు
2.సోమవారం నుంచి అనకాపల్లి అచ్యుతాపురంల మధ్య సర్వే
విశాఖపట్నం(విశాల విశాఖ): కాకినాడ విశాఖల మధ్య నిర్మితం కానున్న పెట్రోలియం కెమికల్ పెట్రో అండ్ ఇన్ వెస్ట్‌మెంట్ రీజియన్ (పీసీపీఐఆర్) ప్రాజెక్టులో భాగంగా జిల్లాలో రూ.150 కోట్లతో పలు రోడ్లు నిర్మించనున్నారు. యలమంచిలి నుంచి అచ్యుతాపురం వరకూ 14 కిలోమీటర్ల రోడ్డును రూ.75 కోట్లతోను,అనకాపల్లి నుంచి అచ్యుతాపురానికి 14 కిలోమీటర్ల రోడ్‌ను రూ.75 కోట్లతో చేపడతారు. ప్రాజెక్టు వ్యయానికి అవసరమైన నిధుల్లో రూ.37.5 కోట్లు కేంద్రప్రభుత్వం,మిగిలిన సగం రాష్ట్ర ప్రభుత్వం భరిస్తాయి. ఇప్పటికే యలమంచిలి,అచ్యుతాపురంల మధ్య సర్వే పనులు ప్రారంభమయ్యాయి.సోమవారం నుంచి అనకాపల్లి అచ్యుతాపురంల మధ్య సర్వే చేపడతారు. ఇప్పటికే తొలిదశ సర్వే పనులకు రూ.15కోట్లు విడుదలయ్యాయి. పెట్రో కారిడార్ నుంచి జాతీయ రహదారికి అనుసంధానంగా రోడ్ల నిర్మాణం ఉంటుంది. ఈమేరకు రోడ్లకు ఇరువైపులా ఉన్న ఇళ్లను,సాగుభూములను, మరికొన్ని చోట్ల దుకాణ సముదాయాలను లెక్కించి అక్కడి మార్కెట్ ధరకు (రిజిస్ట్రేషన్ శాఖ వివరాల ప్రకారం) అనుగుణంగా చెల్లింపులు జరుపుతారు. తొలుత సమగ్ర సర్వే పూర్తిచేసి భూసేకరణ మొత్తం ఏ మేరకు అవసరం ఉంటుంది,పరిహారంగా ఎంత చెల్లించాలి,ఇళ్లను తొలగించాల్సి వస్తే ఎందరు నిరాశ్రయులవుతారు తదితర వివరాలు సేకరిస్తారు.పునరావాసానికి ప్రత్యామ్నాయ ఏర్పాట్లు, అభిప్రాయసేకరణ తదితర వాటిపై సర్వే సమయంలో లభించిన సమాచారం ఆధారంగా రోడ్లు,భవనాల శాఖ నివేదికలు రూపొందిస్తుంది. ముందుగా భూములను సేకరించి పరిహారం చెల్లింపులు జరిపి,ఎటువంటి ఆటంకాలు లేవని నిర్ధారించిన తరువాతే రోడ్డు విస్తరణకు కేంద్రం నుంచి వాటా నిధులు విడుదలవుతాయి. ఈ ప్రక్రియ పూర్తికి నాలుగు అయిదు నెలల సమయం పట్టే అవకాశం ఉంది.
కామెంట్‌లు లేవు:
కామెంట్‌ను పోస్ట్ చేయండి