ఈ "రాజా" కుంభకోణం ప్రస్తుతం ప్రధాని పీఠాన్నే తాకి సలసలా కాగుతోంది. పీఠం వద్ద ఎప్పుడు బ్లాస్ట్ అవుతుందో తెలియని పరిస్థితి నెలకొంది. "ఏ ప్రాంతమేగినా.. ఎందు కాలిడినా..." ప్రతిపక్షాలు రాజా "వర్ణపటం" మేజిక్కు గురించే తూర్పారబడుతున్నాయి. ఆ మ్యాజిక్ వెనుక ఉన్న అసలు రంగు వెలికి తీయాలంటూ పట్టుబడుతున్నాయి. ఇరు సభలను స్తంభింపజేస్తున్నాయి. దీంతో సభ సమావేశమైన నిమిషాల్లోనే వాయిదాపడుతున్నాయి.
ఇక దీపావళి పండుగకు ఒబామా రాక మునుపు వెలుగు చూసిన 31 అంతస్తుల భవనం తాలూకు కుంభకోణం... ఆదర్శ్. ఈ భవనానికి సంబంధించిన ప్లాట్ల కేటాయింపుల్లో మహారాష్ట్ర ముఖ్యమంత్రి అశోక్ చవాన్ తన చేతివాటాన్ని ప్రదర్శించారని అక్కడి ప్రతిపక్షాలు గగ్గోలు పెట్టాయి. దీంతో ఎటూ పాలుపోని కాంగ్రెస్ హైకమాండ్ చవాన్‌ను పదవి నుంచి తొలగించి చేతులు దులుపుకుంది. చవాన్‌ను త్వరలో సీబీఐ ప్రశ్నించనుంది.
అంతకుముందు, దేశం ఎంతో ప్రతిష్టాత్మకంగా నిర్వహించాలనుకున్న కామన్వెల్త్ క్రీడల వ్యవహారంలో సుమారు 8 వేల కోట్ల రూపాయల మేర అవకతవకలు జరిగాయనీ, అందుకు సురేష్ కల్మాడీ బాధ్యులని ఆరోపణలొచ్చాయి. దీంతో ఎటూ తేల్చుకోలేని సర్కార్ ఒబామా అటు వెళ్లగానే ఆయనను కాంగ్రెస్ పార్లమెంటరీ పార్టీ కార్యదర్శి పదవి నుంచి తొలగించి తాత్కాలికంగా ఉపశమనం పొందింది. అయితే ఒలింపిక్ అసోసియేషన్ అధ్యక్షుడుగా ఆయన కొనసాగడం విచిత్రమే. అదలా వుంచితే... కల్మాడీని కూడా త్వరలో సీబీఐ ప్రశ్నించనుంది.
ఇంకా మరీ ముందుకు వెళ్లి యూపీఎ చరిత్రను తిరగేస్తే మాజీమంత్రి శశీ థరూర్, శరద్ పవార్, ప్రఫుల్ పటేల్ వగైరాలంతా సూపర్‌సోనిక్ క్రికెట్ గేమ్ ఐపీఎల్ ద్వారా కోట్లకు కోట్లు అక్రమాలకు పాల్పడ్డారంటూ ఆమధ్య విమర్శలు వెల్లువెత్తాయి. దీంతో థరూర్‌పై వేటు వేసి కాంగ్రెస్ ఊపిరి పీల్చుకుంది. ఈయన వ్యవహారం ఏమైందన్న సంగతి ప్రస్తుతానికి తెలియడం లేదు.
ఇలా చెప్పుకుంటూ పోతే... కొంతమందికే తెలిసిన సబ్‌మెరైన్ ఒప్పందాల్లో అవకతవకలు, బియ్యం ఎగుమతుల్లో ప్రైవేటు వ్యక్తుల హస్తం, అణు ఒప్పందం బిల్లు ఆమోదం సమయంలో ప్రభుత్వ విశ్వాసంకోసం "క్యాష్ ఫర్ ఓట్" ఆరోపణలు, ప్రసారభారతిలో రూ. 60 కోట్లకు పైగా ప్రభుత్వానికి లూటీ... తదితరాలన్నీ మినీ కుంభకోణాలు.
వీటన్నిటినీ మించిన భారీ కుంభకోణం ఇపుడు వెలుగుచూసిన 2జి స్పెక్ట్రమ్. ఈ స్కాంలో ఏకంగా ప్రభుత్వ ఖజానాకు దక్కాల్సిన లక్షా 70 వేల కోట్ల రూపాయలు లూటీ జరిగిపోయింది. ప్రభుత్వ రథసారథి అయిన మన్మోహన్ సింగ్‌కు తెలియకుండా ఈ వ్యవహారం జరిగిందా...? అని ప్రతిపక్షాలు విమర్శిస్తున్నాయి. దీనిపై ప్రధాని తక్షణమే స్పందించాలని ఎగువ, దిగువ సభలను స్తంభింపజేస్తున్నాయి విపక్షాలు.
ఏం చేయాలో పాలుపోని యూపీఎ ప్రభుత్వం ప్రస్తుతానికి దిక్కులు చూస్తోంది. కుంభకోణం మొత్తం వ్యవహారాన్ని మాజీమంత్రి రాజాపై నెట్టివేసే దారులు ఏమైనా ఉన్నాయా...? అన్న ఆలోచనలు సైతం చేస్తున్నట్లు వార్తలు వస్తున్నాయి.
ఇన్ని కుంభకోణాల నడుమ యూపీఎ సర్కార్ ఎంతకాలం తన పాలనను నెట్టుకొస్తుందో చూడాలి.
కామెంట్‌లు లేవు:
కామెంట్‌ను పోస్ట్ చేయండి