విశాలవిశాఖ

 । పోలవరం పనులు ప్రారంభించండి
కాంగ్రెస్ ఎంపీ ఉండవల్లి అరుణ్‌కుమార్ డిమాండ్
న్యూఢిల్లీ : పోలవరం ప్రాజెక్టు పనులను తక్షణమే ప్రారంభించాలని రాజమండ్రి కాంగ్రెస్ ఎంపీ ఉండవల్లి అరుణ్‌కుమార్ డిమాండ్ చేశారు. బుధవారం ఆయన ఇక్కడ మీడియాతో మాట్లాడుతూ పోలవరంపై వస్తున్న అపోహలు అర్థరహితమన్నారు. హోదా సంగతి పక్కన పెట్టినిలిపివేసిన ప్రాజెక్టు పనులను వెంటనే పునరుద్దరించాలని డిమాండ్ చేశారు. స్పిల్‌వే నిర్మాణానికి పోలవరమే అనువైన ప్రాంతమన్నారు.ఏటా 3వేల టీఎంసీల నీరు వృధాగా సముద్రంలోకి పోతోందని ఉండవల్లి అన్నారు. సీజన్లో నీరు రావాలంటే రైతులకు పోలవరమే దిక్కు అన్నారు. ఈ ప్రాజెక్టుపై రైతులు ఎన్నో ఆశలు పెట్టుకున్నారని నిర్మాణం ఆగితే రాష్ట్రంలో ఆహార సమస్య ఏర్పడుతుందన్నారు. పోలవరం ధాన్యాగారానికే కాకుండా, దేశానికే వరప్రసాదం అన్నారు. పోలవరం లేకుంటే కృష్ణా డెల్టా బీడుగా మారుతుందన్నారు. నష్టం వస్తుందని భయపడి ప్రాజెక్టు పనులు నిలిపివేయటం సరికాదన్నారు. ఎస్‌ఆర్ రేట్లు గిట్టుబాటు కాకపోవటంతోనే టెండర్లు నిలిచిపోయాయన్నారు.ప్రాజెక్టు నిర్మాణం వల్ల ఒడిషాకు గానీ, ఛత్తీస్‌గఢ్‌కు కానీ అభ్యంతరాలు ఉండే ప్రశ్నేలేదన్నారు. వ్యవసాయ రంగం బాగుపడితే దేశం ప్రగతిబాటలో పయనిస్తుందని దివంగత నేత వైఎస్ రాజశేఖరరెడ్డి ఆలోచన అన్నారు. పోలవరంపై పెట్టే పెట్టుబడి అయిదేళ్లలో తిరిగి వస్తుందన్నారు. దేశంలో ఎక్కడలేని విధంగా పోలవరం నిర్వాసితులకు పునరావాస ప్యాకేజీ ఇచ్చామన్నారు. ఆధునిక సాంకేతిక పరిజ్ఞానంతో కేవలం రెండేళ్లలో పోలవరం ప్రాజెక్టు నిర్మాణాన్ని పూర్తి చేయవచ్చని ఉండవల్లి అన్నారు.