కనికరం లేని ఎంపీలు

Add caption

ప్రరాపా అధినేత చిరంజీవి విమర్శలు
 యలమంచిలి, పాలకొల్లు : వరుస ప్రకృతి వైపరీత్యాలతో రైతులు పంటలు నష్టపోయి అప్పులపాలవుతుంటే మన రాష్ట్ర అధికార పార్టీ ఎంపీలు వారిని ఆదుకునేందుకు అవసరమైన నిధులను కేంద్రం నుంచి తీసుకురావటంలో విఫలమవుతున్నారని ప్రజారాజ్యం పార్టీ అధినేత చిరంజీవి అన్నారు. రైతులపై మన ఎంపీలకు కనికరం లేదని వ్యాఖ్యానించారు. సోమవారం ఆయన తూర్పు, పశ్చిమ గోదావరి జిల్లాల్లోని ముంపు ప్రాంతాల్లో ఆయన పర్యటించారు. ఈ సందర్భంగా అమలాపురం, ఇతర ప్రాంతాల్లో విలేకరులతో మాట్లాడారు. రాష్ట్రం నుంచి అధికార పార్టీ తరఫున అత్యధికంగా ఎంపీలు ఎన్నికైనా వారిద్వారా రాష్ట్రానికి కేంద్రం నుంచి చేకూరుతున్న ప్రయోజనాలు శూన్యమని విమర్శించారు. పొరుగున ఉన్న తమిళనాడు ఎంపీలు 200-2009 సంవత్సరాల మధ్య తమిళనాడు ఎంపీలు రోడ్లు తదితర అవసరాల కోసం రూ.10 వేల కోట్ల నిధులు కేంద్రం నుంచి మంజూరుచేయించుకొంటే మన ఎంపీలు రూ.వెయ్యి కోట్లు తేగలిగారని ఎద్దేవా చేశారు. ఈ తేడాను గమనిస్తే మన ఎంపీల పనితీరు సిగ్గుపడేలా ఉందన్నారు. పంజాబ్‌ ఎంపీలు ఆ రాష్ట్రంలో పండిన పూసారకం బియ్యానికి గిట్టుబాటు ధర కల్పించుకోవడంతో పాటు ఆ ఉత్పత్తిని ఎగుమతి చేసుకునే విధంగా కేంద్రాన్ని ఒప్పించడంలో సఫలీకృతులయ్యారని గుర్తుచేశారు. మన ఎంపీలు తడిచిన ధాన్యాన్ని ఎఫ్‌.సి.ఐ. కొనుగోలు చేయించటం... ఉప్పుడు బియ్యంగా మార్చి ఎగుమతులు చేయడంవంటి విషయాల్లో చొరవ చూపలేకపోతున్నారని విమర్శించారు. గత ఏడాది కృష్ణానది వరదల వల్ల రూ.వేల కోట్లలో నష్టం వాటిల్లిందని.. దీనికి కేంద్రం నుంచి రూ.వెయ్యి కోట్లకు మంజూరు తెస్తే అందులో రూ.550 కోట్లే మన ఎంపీలు తేగలిగారని చెప్పారు. గోదావరి జిల్లాల్లో డ్రెయినేజీ వ్యవస్థ అధ్వానంగా ఉందని, ఈ కారణంగానే చేలు ముంపుబారిన పడి విపరీతంగా నష్టపోతున్నాయని అన్నారు. ఎన్నో ప్రాజెక్టులు చేపడుతున్న ప్రభుత్వాలు వ్యవసాయరంగానికి కీలకమైన మురుగుకాల్వలు బాగుచేయకలేకపోవటం విచారకరమన్నారు.